శ్రీ సభ పునీతులును ఎలా ఎంపిక చేస్తుంది ? | Canonization process in catholic church Telugu

శ్రీ సభ లో పునీతుల ఎంపిక ప్రక్రియ

ఈ ప్రక్రియ వ్యక్తి చనిపోయిన 5 సంవత్సరాల తర్వాత మొదలవుతుంది. ఈ ప్రక్రియ మొత్తం నాలుగు దశలు కలిగి వుంటుంది.

1. దైవ సేవకుడు లేదా దైవ సేవకురాలు (Servant Of God)

2. గౌరవింపదగిన వారు (Venerable)

3. ధన్యులు (Blessed)

4. పునీతులు (Saints)

ఈ మొత్తం ప్రక్రియ పూర్తి కావడానికి కొన్ని సంవత్సరాలు పడుతుంది.

స్థానికంగా ఉండే బిషప్ చనిపోయినటువంటి వ్యక్తి యొక్క సమాచారాన్ని సేకరిస్తారు.

• అతను ధర్మమార్గంలో పవిత్రమైన జీవితం జీవించాడా లేదా? 
• వేద సాక్షి మరణం అయితే నిజముగా వేద సాక్షి మరణం పొందారా లేదా?
• దైవ ప్రేమతో తోటి వారికి మంచి పనులు చేశాడా లేదా?

అనే విషయాల పై విచారణ చేస్తారు .ఏవైనా ఆధ్యాత్మికమైన రచనలు రచిస్తే వాటిని కూడా సేకరిస్తారు.

ఈ సమాచారాన్ని అంతా ఒక నివేదికగా రూపొందించి శ్రీ సభకు సమర్పిస్తారు.

Congregation for the causes of saints అనే బృందం ఈ నివేదికను మరొకసారి విచారిస్తుంది. అభ్యర్థి యొక్క మరణం వేద సాక్షి మరణం అయితే నిజంగా విశ్వాసం కోసం మరణించారా మరియు శ్రీ సభ కొరకుతన జీవితాన్ని అర్పించారా?  దైవ ప్రేమ మరియు సోదర ప్రేమ తో జీవించారా? అనే విషయాలపై విచారణచేసి నిర్ధారించుకుని, Congregation for the causes of saints ఆమోదించిన  తరువాత దైవ సేవకుడు లేదా దైవ సేవకురాలు గా (Servant Of God) పిలవబడతారు.

తరువాత అభ్యర్థి యొక్క సద్గుణాలను పరిశీలిస్తారు.

• విశ్వాసం 
• నిరీక్షణ 
• ప్రేమ 
• వివేకము 
• నీతి 
• నిగ్రహం
• దృఢత్వం 

వంటి సద్గుణాలను కలిగి ఉన్నారా లేదా? అని పరిశీలిస్తారు. ఈ సద్గుణాలతో పవిత్రమైన జీవితం  జీవిస్తే  గౌరవింప దగిన వారిగా (Venerable) పిలవబడతారు.

పునీతులు పరలోకంలో ఉన్నారని శ్రీ సభ విశ్వసిస్తోంది. ఒక వ్యక్తిని పునీతుడు లేదా  పునీతురాలుగా ఎంపిక చేసే ప్రక్రియలో భాగంగా వారి మధ్యవర్తిత్వ ప్రార్థనా ఫలితంగా మొత్తం రెండు అద్భుతాలు జరగవలసి ఉంటుంది. కానీ ఈ అద్భుతాలు దేవుడు చేసినవి మాత్రమే అభ్యర్థి స్వశక్తితో చేసినవి కావు. అభ్యర్థి తను నమ్ముకున్న విశ్వాసం కొరకు వేదసాక్షిగా మరణిస్తే ఆ వ్యక్తిని పునీతులుగా ప్రకటించడానికి మొదటి అద్భుతం జరగనవసరం లేదు. ఎందుకంటే వేదసాక్షిగా మరణం పొందిన వారు పరలోకంలో ఉన్నారని శ్రీ సభ నమ్ముతోంది.

అభ్యర్థి యొక్క మరణం సాధారణమైన మరణం అయితే అభ్యర్థి మధ్యవర్తిత్వ ప్రార్థన ద్వారా ఏదైనా ఒక అద్భుతం జరిగితే అతడు లేదా ఆమె పరలోకంలో ఉన్నారని గుర్తిస్తారు.సాధారణంగా ఈ అద్భుతం ఏదైనా ఒక రోగికి స్వస్థత  కలగడం.

ఈ స్వస్థత సంపూర్ణంగా ఉండాలి మరియు తక్షణం జరిగి ఉండాలి మరియు శాస్త్రీయంగా వివరించడానికి సాధ్యం కానిదిగా  ఉండాలి. ఈ అద్భుతాన్ని మొదట స్వతంత్ర వైద్యుల బృందం చే శాస్త్రీయంగా వివరించలేనిదిగా ధ్రువీకరించాలి.  వైద్యుల ధ్రువీకరణ తరువాత వేదాంతవేత్తల  బృందం ఆ వ్యక్తిని  ఆమోదించి తుది ఆమోదం కొరకు పోప్ గారి దగ్గరకు పంపబడుతుంది. పోప్ గారు ఆమోదించిన తర్వాత ఆ వ్యక్తి  ధన్యులుగా (Blessed) పిలవబడతారు.

అభ్యర్థిని ఒకసారి ధన్యులుగా  ఆమోదించిన తర్వాత ఆ వ్యక్తిని గౌరవించే విధంగా ఏదైనా ఒక ప్రత్యేక ప్రార్థన లేదా పూజ బలి నిర్వహించుటకు అనుమతి ఇస్తారు.కానీ ఇది ఒక ఊరు లేదా  ఒక ప్రాంతానికి లేదా ఒక సమూహానికి మాత్రమే పరిమితం చేస్తారు.

చివరగా ఆ వ్యక్తి  పునీతుడు లేదా పునీతురాలిగా   ప్రకటింపబడాలంటే రెండవ అద్భుతం జరగాలి. రెండవ అద్భుతం జరిగిన తర్వాత మొదటి అద్భుతం లాగానే  స్వతంత్ర వైద్యుల బృందం చేత మరియు వేదాంత వేత్తల బృందం చేత ఆమోదింపబడాలి. తర్వాత పొప్ గారి  ఆమోదం కొరకు పంపబడుతుంది. చివరకు పొప్ గారు ఆమోదించిన తర్వాత ఆ వ్యక్తిని పునీతులుగా (Saints) ప్రకటిస్తారు. ఈ ప్రక్రియను canonization అంటారు. canonization తర్వాత విశ్వ శ్రీ సభ  పునీతులుగా  గౌరవిస్తుంది వారి పండుగ దినాలను జరుపుకుంటుంది . వారిని గౌరవించే విధంగా కొన్ని దేవాలయాలకు వారి పేర్లు పెట్టుకుంటారు.

For more information please visit our YouTube channel

https://www.youtube.com/c/AveMaria35